بريوش معمر باللوز يا سلاااام

السلام عليكم و رحمة الله هذا البريوش كايجي لديد و راائع أتمنى تجربوه و تردو عليا الخبار 

المقادير 

نص كيلو فورص
 60 غرام سنيدة
60 غرام زبدة لينة
 2 معالق كبار حليب بودرة
 2 بيضات 
 ملح 
 الما دافئ للعجن 

خميرة فورية 



الحشوة 

غادي نحتاجوا 100 غرام اللوز نص منقي و نص بقشورو + 100 غرام زبدة + بيضة 1 + 100 غرام سكر كلاسي + معلقة كبيرة فورص واخة صورت 2 بيضات أنا ستعملت غي 1 قدات

نطحن اللوز و نخلطو مع باقي المقادير د الحشو و نخليه فالثلاجة حتى وقت الإستعمال من جهة أخرى نعجن العجين و يكون ماشي خفيف بزاف مشي قاصح يكون  رطب و يلصق شوية باليد و نخليه شي ساعة أو أكثر باش يخمر 

ملي خمرات نخدمها شوية باليد و نشكلها كويرات بحال لي فالصورة و ندهن يدي بالزيت حيث تلصق فاليد نكرصها شوية و ندير معيلقة من لحشو و نجمع الكورة و نضغط عليها شوية بحال يلا نكرصها شوية 

و نخليها تخمر شي 15 دقيقة أخرى و من بعد ندهنها بالبيض و ندخلها للفران يكون سخون من قبل

و النتيجة رائعة 

لا تنسوني من صالح الدعاء